Previous Previous:
From Troilus and Criseyde, Book II, lines 1-49:
Prologue
Previous
Librarius Homepage
© Librarius
All rights reserved.




Geoffrey Chaucer (1342 - 1400):
Troilus and Criseyde
Book II, lines 50-77: Pandarus goes to his niece Criseyde


Incipit Liber Secundus.

50In May, that moder is of monthes glade,
That fresshe floures, blew, and whyte, and rede,
Ben quike agayn, that winter dede made,
And ful of bawme is fleting every mede;
Whan Phebus doth his brighte bemes sprede
55Right in the whyte Bole, it so bitidde
As I shal singe, on Mayes day the thridde,

That Pandarus, for al his wyse speche,
Felt eek his part of loves shottes kene,
That, koude he never so wel of loving preche,
60It made his hewe a-day ful ofte grene;
So shoop it, that hym fil that day a tene
In love, for which in wo to bedde he wente,
And made, er it was day, ful many a wente.

The swalwe Proigne, with a sorwful lay,
65Whan morwe com, gan make hir waymentinge,
Why she forshapen was; and ever lay
Pandare a-bedde, half in a slomeringe,
Til she so neigh him made hir chiteringe
How Tereus gan forth hir suster take,
70That with the noyse of hir he gan a-wake;

And gan to calle, and dresse him up to ryse,
Remembringe him his erand was to done
From Troilus, and eek his greet empryse;
And caste and knew in good plyt was the mone
75To doon viage, and took his wey ful sone
Unto his neces paleys ther bi-syde;
Now Janus, god of entree, thou him gyde!





Next Next:
From Troilus and Criseyde, Book II, lines 78-147:
Pandarus meets Criseyde
Next