The Pardoner's Tale, ll. 177-682 (The Canterbury Tales by Geoffrey Chaucer)

From The Canterbury Tales:
The Pardoner's Tale

Heere bigynneth the Pardoners Tale

	In Flaundres whilom was a compaignye
	Of yonge folk, that haunteden folye,
	As riot, hasard, stywes, and tavernes,
180	Wher as with harpes, lutes, and gyternes
	They daunce and pleyen at dees, bothe day and nyght,
	And eten also and drynken over hir myght,
	Thurgh which they doon the devel sacrifise
	Withinne that develes temple in cursed wise,
185	By superfluytee abhomynable.
	Hir othes been so grete and so dampnable
	That it is grisly for to heere hem swere.
	Oure blissed lordes body they totere -
	Hem thoughte that Jewes rente hym noght ynough -
190	And ech of hem at otheres synne lough.
	And right anon thanne comen tombesteres,
	Fetys and smale, and yonge frutesteres,
	Syngeres with harpes, baudes, wafereres,
	Whiche been the verray develes officeres
195	To kyndle and blowe the fyr of lecherye,
	That is annexed unto glotonye.
	The hooly writ take I to my witnesse,
	That luxurie is in wyn and dronkenesse.

	Lo, how that dronken Looth, unkyndely
200	Lay by hise doghtres two, unwityngly;
	So dronke he was, he nyste what he wroghte.
	Herodes, whoso wel the stories soghte,
	Whan he of wyn was repleet at his feeste,
	Right at his owene table he yaf his heeste
205	To sleen the Baptist John, ful giltelees.
	Senec seith a good word, doutelees;
	He seith, he kan no difference fynde
	Bitwix a man that is out of his mynde,
	And a man which that is dronkelewe,
210	But that woodnesse fallen in a shrewe
	Persevereth lenger than dooth dronkenesse.
	O glotonye, ful of cursednesse!
	O cause first of oure confusioun!
	O original of oure dampnacioun
215	Til Crist hadde boght us with his blood agayn!
	Lo, how deere, shortly for to sayn,
	Aboght was thilke cursed vileynye!
	Corrupt was al this world for glotonye!

	Adam oure fader, and his wyf also,
220	Fro Paradys to labour and to wo
	Were dryven for that vice, it is no drede.
	For whil that Adam fasted, as I rede,
	He was in Paradys, and whan that he
	Eet of the fruyt deffended on the tree,
225	Anon he was out cast to wo and peyne.
	O glotonye, on thee wel oghte us pleyne!
	O, wiste a man how manye maladyes
	Folwen of excesse and of goltonyes,
	He wolde been the moore mesurable
230	Of his diete, sittynge at his table.
	Allas, the shorte throte, the tendre mouth
	Maketh that est and west and north and south
	In erthe, in eir, in water, man to swynke
	To gete a glotoun deyntee mete and drynke!
235	Of this matiere, O Paul! wel kanstow trete:
	"Mete unto wombe and wombe eek unto mete
	Shal God destroyen bothe," as Paulus seith.
	Allas, a foul thyng is it, by my feith,
	To seye this word, and fouler is the dede
240	Whan man so drynketh of the white and rede
	That of his throte he maketh his pryvee
	Thurgh thilke cursed superfluitee.

	The Apostel wepying seith ful pitously,
	"Ther walken manye of whiche yow toold have I -
245	I seye it now wepyng with pitous voys,
	That they been enemys of Cristes croys,
	Of whiche the ende is deeth, wombe is hir god."
	O wombe! O bely! O stynkyng cod!
	Fulfilled of donge and of corrupcioun,
250	At either ende of thee foul is the soun;
	How greet labour and cost is thee to fynde,
	Thise cookes, how they stampe, and streyne, and grynde,
	And turnen substaunce into accident,
	To fulfillen al thy likerous talent!
255	Out of the harde bones knokke they
	The mary, for they caste noght awey,
	That may go thurgh the golet softe and swoote;
	Of spicerie, of leef, and bark, and roote,
	Shal been his sauce ymaked by delit,
260	To make hym yet a newer appetit.
	But, certes, he that haunteth swiche delices
	Is deed, whil that he lyveth in tho vices.
	A lecherous thyng is wyn, and dronkenesse
	Is ful of stryvyng and of wrecchednesse.
265	O dronke man, disfigured is thy face!
	Sour is thy breeth, foul artow to embrace,
	And thurgh thy dronke nose semeth the soun,
	As though thow seydest ay, "Sampsoun! Sampsoun!"
	And yet, God woot, Sampsoun drank nevere no wyn!
270	Thou fallest, as it were a styked swyn;
	Thy tonge is lost, and al thyn honeste cure;
	For dronkenesse is verray sepulture
	Of mannes wit and his discrecioun,
	In whom that drynke hath dominacioun.
275	He kan no conseil kepe, it is no drede.
	Now kepe yow fro the white and fro the rede,
	And namely, fro the white wyn of Lepe,
	That is to selle in fysshstrete, or in Chepe.
	This wyn of Spaigne crepeth subtilly
280	In othere wynes, growynge faste by,
	Of which ther ryseth swich fumositee,
	That whan a man hath dronken draughtes thre
	And weneth that he be at hoom in Chepe,
	He is in Spaigne, right at the toune of Lepe,
285	Nat at the Rochele, ne at Burdeux toun;
	And thanne wol he seye "Sampsoun, Sampsoun!"
	But herkneth, lordynges, o word I yow preye,
	That alle the sovereyn actes, dar I seye,
	Of victories in the Olde Testament,
290	Thurgh verray God that is omnipotent
	Were doon in abstinence and in preyere.
	Looketh the Bible, and ther ye may it leere.

	Looke, Attilla, the grete conquerour,
	Deyde in his sleepe, with shame and dishonour,
295	Bledynge ay at his nose in dronkenesse.
	A capitayn sholde lyve in sobrenesse;
	And over al this avyseth yow right wel,
	What was comaunded unto Lamwel,
	Nat Samuel, but Lamwel, seye I -
300	Redeth the Bible and fynde it expresly,
	Of wyn yevyng to hem that han justise.
	Namoore of this, for it may wel suffise.
	And now that I have spoken of glotonye,
	Now wol I yow deffenden hasardrye.
305	Hasard is verray mooder of lesynges,
	And of dedeite and cursed forswerynges,
	Blaspheme of Crist, manslaughtre and wast also
	Of catel and of tyme, and forthermo
	It is repreeve and contrarie of honour
310	For to ben holde a commune hasardour.
	And ever the hyer he is of estaat,
	The moore is he holden desolaat;
	If that a prynce useth hasardrye,
	In all governaunce and policye
315	He is as by commune opinioun
	Yholde the lasse in reputacioun.
	Stilboun, that was a wys embassadour,
	Was sent to Corynthe in ful greet honour,
	Fro Lacidomye to maken hire alliaunce.
320	And whan he cam hym happede par chaunce,
	That alle the gretteste that were of that lond
	Pleyynge atte hasard he hem fond.
	For which, as soone as it myghte be,
	He stal hym hoom agayn to his contree,
325	And seyde, "Ther wol I nat lese my name,
	Ne I wol nat take on me so greet defame.
	Yow for to allie unto none hasardours.
	Sendeth othere wise embassadours,
	For by my trouthe me were levere dye
330	Than I yow sholde to hasardours allye.
	For ye that been so glorious in honours
	Shul nat allyen yow with hasardours
	As by my wyl, ne as by my tretee."
	This wise philosophre, thus seyde hee.

335	Looke eek that to the kyng Demetrius
	The kyng of Parthes, as the book seith us,
	Sente him a paire of dees of gold, in scorn,
	For he hadde used hasard ther-biforn,
	For which he heeld his glorie or his renoun
340	At no value or reputacioun.
	Lordes may fynden oother maner pley
	Honeste ynough, to dryve the day awey.
	Now wol I speke of othes false and grete
	A word or two, as olde bookes trete.
345	Gret sweryng is a thyng abhominable,
	And fals sweryng is yet moore reprevable.
	The heighe God forbad sweryng at al,
	Witnesse on Mathew; but in special
	Of sweryng seith the hooly Jeremye,
350	"Thou shalt seye sooth thyne othes, and nat lye,
	And swere in doom, and eek in rightwisnesse";
	But ydel sweryng is a cursednesse.
	Bihoold and se, that in the firste table
	Of heighe Goddes heestes honurable
355	How that the seconde heeste of hym is this:
	"Take nat my name in ydel or amys."
	Lo, rather he forbedeth swich sweryng
	Than homycide, or any cursed thyng;
	I seye, that as by ordre thus it stondeth,
360	This knowen that hise heestes understondeth
	How that the seconde heeste of God is that.
	And forther-over I wol thee telle al plat,
	That vengeance shal nat parten from his hous
	That of hise othes is to outrageous.
365	"By Goddes precious herte," and "by his nayles,"
	And "By the blood of Crist that is in Hayles,
	Sevene is my chaunce and thyn is cynk and treye!"
	"By Goddes armes, if thou falsly pleye,
	This daggere shal thurghout thyn herte go!"
370	This fruyt cometh of the bicched bones two,
	Forsweryng, ire, falsnesse, homycide!
	Now, for the love of Crist, that for us dyde,
	Lete youre othes bothe grete and smale.
	But, sires, now wol I telle forth my tale.

375	Thise riotoures thre, of whiche I telle,
	Longe erst er prime rong of any belle,
	Were set hem in a taverne for to drynke.
	And as they sat, they herde a belle clynke
	Biforn a cors, was caried to his grave.
380	That oon of hem gan callen to his knave,
	"Go bet," quod he, "and axe redily
	What cors is this, that passeth heer forby;
	And looke, that thou reporte his name weel."
	"Sire," quod this boy, "it nedeth never a deel;
385	It was me toold, er ye cam heer two houres.
	He was, pardee, an old felawe of youres;
	And sodeynly he was yslayn to-nyght,
	Fordronke, as he sat on his bench upright.
	Ther cam a privee theef men clepeth Deeth,
390	That in this contree al the peple sleeth,
	And with his spere he smoot his herte atwo,
	And wente his wey withouten wordes mo.
	He hath a thousand slayn this pestilence.
	And, maister, er ye come in his presence,
395	Me thynketh that it were necessarie
	For to be war of swich an adversarie.
	Beth redy for to meete hym everemoore;
	Thus taughte me my dame, I sey namoore."
	"By Seinte Marie!" seyde this taverner,
400	"The child seith sooth, for he hath slayn this yeer
	Henne over a mile, withinne a greet village
	Bothe man and womman, child, and hyne, and page.
	I trowe his habitacioun be there.
	To been avysed, greet wysdom it were,
405	Er that he dide a man a dishonour."
	"Ye, Goddes armes!" quod this riotour,
	"Is it swich peril with hym for to meete?
	I shal hym seke, by wey and eek by strete,
	I make avow to Goddes digne bones!
410	Herkneth, felawes, we thre been al ones;
	Lat ech of us holde up his hand til oother,
	And ech of us bicomen otheres brother,
	And we wol sleen this false traytour Deeth.
	He shal be slayn, which that so manye sleeth,
415	By Goddes dignitee, er it be nyght!"
	Togidres han thise thre hir trouthes plight
	To lyve and dyen, ech of hem for oother,
	As though he were his owene ybore brother;
	And up they stirte al dronken in this rage,
420	And forth they goon towardes that village,
	Of which the taverner hadde spoke biforn.
	And many a grisly ooth thanne han they sworn,
	And Cristes blessed body they torente -
	Deeth shal be deed, if that they may hym hente!
425	Whan they han goon nat fully half a mile,
	Right as they wolde han troden over a stile,
	An oold man and a povre with hem mette.
	This olde man ful mekely hem grette,
	And seyde thus, "Now, lordes, God yow see!"
430	The proudeste of thise riotoures three
	Answerde agayn, "What, carl, with sory grace,
	Why artow al forwrapped save thy face?
	Why lyvestow so longe in so greet age?"
	This olde man gan looke in his visage,
435	And seyde thus: "For I ne kan nat fynde
	A man, though that I walked into Ynde,
	Neither in citee nor in no village,
	That wolde chaunge his youthe for myn age;
	And therfore mooth I han myn age stille,
440	As longe tyme as it is Goddes wille.
	Ne Deeth, allas, ne wol nat han my lyf.
	Thus walke I lyk a restelees kaityf,
	And on the ground, which is my moodres gate,
	I knokke with my staf bothe erly and late,
445	And seye, "Leeve mooder, leet me in!
	Lo, how I vanysshe, flessh and blood and skyn!
	Allas, whan shul my bones been at reste?
	Mooder, with yow wolde I chaunge my cheste,
	That in my chambre longe tyme hath be,
450	Ye, for an heyre-clowt to wrappe me."
	But yet to me she wol nat do that grace,
	For which ful pale and welked is my face.

	But, sires, to yow it is no curteisye
	To speken to an old man vileynye,
455	But he trespasse in word, or elles in dede.
	In Hooly Writ ye may yourself wel rede,
	'Agayns an oold man, hoor upon his heed,
	Ye sholde arise;' wherfore I yeve yow reed,
	Ne dooth unto an oold man noon harm now,
460	Namoore than that ye wolde men did to yow
	In age, if that ye so longe abyde.
	And God be with yow where ye go or ryde.
	I moote go thider, as I have to go."
	"Nay, olde cherl, by God, thou shalt nat so,"
465	Seyde this oother hasardour anon;
	"Thou partest nat so lightly, by Seint John!
	Thou spak right now of thilke traytour Deeth,
	That in this contree alle oure freendes sleeth.
	Have heer my trouthe, as thou art his espye,
470	Telle where he is, or thou shalt it abye,
	By God and by the hooly sacrament!
	For soothly thou art oon of his assent
	To sleen us yonge folk, thou false theef?"
	"Now, sires," quod he, "if that ye be so leef
475	To fynde Deeth, turne up this croked wey,
	For in that grove I lafte hym, by my fey,
	Under a tree, and there he wole abyde;
	Noght for your boost he wole him no thyng hyde.
	Se ye that ook? Right ther ye shal hym fynde.
480	God save yow that boghte agayn mankynde,
	And yow amende!" Thus seyde this olde man;
	And everich of thise riotoures ran
	Til he cam to that tree, and ther they founde
	Of floryns fyne of gold ycoyned rounde
485	Wel ny an eighte busshels, as hem thoughte.
	No lenger thanne after Deeth they soughte,
	But ech of hem so glad was of that sighte,
	For that the floryns been so faire and brighte,
	That doun they sette hem by this precious hoord.
490	The worste of hem, he spak the firste word.
	"Bretheren," quod he, "taak kepe what I seye;
	My wit is greet, though that I bourde and pleye.
	This tresor hath Fortune unto us yeven,
	In myrthe and joliftee oure lyf to lyven,
495	And lightly as it comth, so wol we spende.
	Ey, Goddes precious dignitee! Who wende
	To-day that we sholde han so fair a grace?
	But myghte this gold be caried fro this place
	Hoom to myn hous or elles unto youres -
500	For wel ye woot that al this gold is oures -
	Thanne were we in heigh felicitee.
	But trewely, by daye it may nat bee;
	Men wolde seyn that we were theves stronge,
	And for oure owene tresor doon us honge.
505	This tresor moste ycaried be by nyghte
	As wisely and as slyly as it myghte.
	Wherfore I rede that cut among us alle
	Be drawe, and lat se wher the cut wol falle,
	And he that hath the cut, with herte blithe
510	Shal renne to the towne, and that ful swithe,
	And brynge us breed and wyn, ful prively;
	And two of us shul kepen subtilly
	This tresor wel, and if he wol nat tarie,
	Whan it is nyght, we wol this tresor carie,
515	By oon assent, where as us thynketh best."
	That oon of hem the cut broghte in his fest,
	And bad hym drawe, and looke where it wol falle;
	And it fil on the yongeste of hem alle,
	And forth toward the toun he wente anon.
520	And al so soone, as that he was agon,
	That oon of hem spak thus unto that oother,
	"Thou knowest wel thou art my sworen brother;
	Thy profit wol I telle thee anon.
	Thou woost wel, that oure felawe is agon,
525	And heere is gold, and that ful greet plentee,
	That shal departed been among us thre.
	But nathelees, if I kan shape it so
	That it departed were among us two,
	Hadde I nat doon a freendes torn to thee?"

530	That oother answerde, "I noot hou that may be;
	He woot how that the gold is with us tweye;
	What shal we doon? What shal we to hym seye?"
	"Shal it be conseil?" seyde the firste shrewe,
	"And I shal tellen, in a wordes fewe,
535	What we shal doon, and bryngen it wel aboute."
	"I graunte," quod that oother, "out of doute,
	That by my trouthe I shal thee nat biwreye."
	"Now," quod the firste, "thou woost wel we be tweye,
	And two of us shul strenger be than oon.
540	Looke whan that he is set, that right anoon
	Arys, as though thou woldest with hym pleye,
	And I shal ryve hym thurgh the sydes tweye,
	Whil that thou strogelest with hym as in game,
	And with thy daggere looke thou do the same;
545	And thanne shal al this gold departed be,
	My deere freend, bitwixen me and thee.
	Thanne may we bothe oure lustes all fulfille,
	And pleye at dees right at oure owene wille."
	And thus acorded been thise shrewes tweye
550	To sleen the thridde, as ye han herd me seye.
	This yongeste, which that wente unto the toun,
	Ful ofte in herte he rolleth up and doun
	The beautee of thise floryns newe and brighte.
	"O lorde," quod he, "if so were that I myghte
555	Have al this tresor to my-self allone,
	Ther is no man that lyveth under the trone
	Of God, that sholde lyve so murye as I."
	And atte laste the feend, oure enemy,
	Putte in his thought that he sholde poyson beye,
560	With which he myghte sleen hise felawes tweye;
	For-why, the feend foond hym in swich lyvynge
	That he hadde leve hem to sorwe brynge.
	For this was outrely his fulle entente,
	To sleen hem bothe, and nevere to repente.
565	And forth he gooth, no lenger wolde he tarie,
	Into the toun unto a pothecarie
	And preyde hym that he hym wolde selle
	Som poyson, that he myghte hise rattes quelle;
	And eek ther was a polcat in his hawe,
570	That, as he seyde, hise capouns hadde yslawe;
	And fayn he wolde wreke hym, if he myghte,
	On vermyn that destroyed hym by nyghte.

	The pothecarie answerde, "And thou shalt have
	A thyng, that al so God my soule save,
575	In al this world ther is no creature
	That eten or dronken hath of this confiture
	Noght but the montance of a corn of whete,
	That he ne shal his lif anon forlete;
	Ye, sterve he shal, and that in lasse while
580	Than thou wolt goon a paas nat but a mile,
	This poysoun is so strong and violent."
	This cursed man hath in his hond yhent
	This poysoun in a box, and sith he ran
	Into the nexte strete unto a man,
585	And borwed of hym large botels thre;
	And in the two his poyson poured he;
	The thridde he kepte clene for his owene drynke.
	For al the nyght he shoop hym for to swynke
	In cariynge of the gold out of that place.
590	And whan this riotour, with sory grace,
	Hadde filed with wyn his grete botels thre,
	To hise felawes agayn repaireth he.
	What nedeth it to sermone of it moore?
	For right as they hadde cast his deeth bifoore,
595	Right so they han him slayn, and that anon.
	And whan that this was doon, thus spak that oon:
	"Now lat us sitte and drynke, and make us merie,
	And afterward we wol his body berie."
	And with that word it happed hym, par cas,
600	To take the botel ther the poyson was,
	And drank, and yaf his felawe drynke also,
	For which anon they storven bothe two.

	But certes, I suppose that Avycen
	Wroot nevere in no canoun, ne in no fen,
605	Mo wonder signes of empoisonyng
	Than hadde thise wrecches two, er hir endyng.
	Thus ended been thise homycides two,
	And eek the false empoysoner also.
	O cursed synne ful of cursednesse!
610	O traytours homycide, O wikkednesse!
	O glotonye, luxurie, and hasardrye!
	Thou blasphemour of Crist, with vileynye
	And othes grete, of usage and of pride,
	Allas, mankynde, how may it bitide
615	That to thy Creatour which that the wroghte,
	And with His precious herte-blood thee boghte,
	Thou art so fals and so unkynde, allas!
	Now, goode men, God foryeve yow youre trespas,
	And ware yow fro the synne of avarice;
620	Myn hooly pardoun may yow alle warice,
	So that ye offre nobles or sterlynges,
	Or elles silver broches, spoones, rynges;
	Boweth youre heed under this hooly bulle!
	Com up, ye wyves, offreth of youre wolle!
625	Youre names I entre heer in my rolle anon,
	Into the blisse of hevene shul ye gon.
	I yow assoille by myn heigh power,
	Yow that wol offre, as clene and eek as cleer
	As ye were born. - And lo, sires, thus I preche.
630	And Jesu Crist, that is oure soules leche,
	So graunte yow his pardoun to receyve,
	For that is best, I wol yow nat deceyve.

	But sires, o word forgat I in my tale:
	I have relikes and pardoun in my male,
635	As faire as any man in Engelond,
	Whiche were me yeven by the popes hond.
	If any of yow wole of devocioun
	Offren, and han myn absolucioun,
	Com forth anon, and kneleth heere adoun,
640	And mekely receyveth my pardoun;
	Or elles taketh pardoun as ye wende,
	Al newe and fressh at every miles ende,
	So that ye offren alwey, newe and newe,
	Nobles or pens, whiche that be goode and trewe.
645	It is an honour to everich that is heer
	That ye mowe have a suffisant pardoneer
	T'assoille yow in contree as ye ryde,
	For aventures whiche that may bityde.
	Paraventure ther may fallen oon or two
650	Doun of his hors, and breke his nekke atwo.
	Look, which a seuretee is it to yow alle
	That I am in youre felaweship yfalle,
	That may assoille yow, bothe moore and lasse,
	Whan that the soule shal fro the body passe.
655	I rede that oure Hoost heere shal bigynne,
	For he is moost envoluped in synne.
	Com forth, sire Hoost, and offre first anon,
	And thou shalt kisse my relikes everychon,
	Ye, for a grote! unbokele anon thy purs.'
660	"Nay, nay," quod he, "thanne have I Cristes curs!
	Lat be," quod he, "it shal nat be, so theech,
	Thou woldest make me kisse thyn olde breech,
	And swere it were a relyk of a seint,
	Though it were with thy fundement depeint.
665	But by the croys which that Seint Eleyne fond,
	I wolde I hadde thy coillons in myn hond
	In stide of relikes or of seintuarie.
	Lat kutte hem of, I wol thee helpe hem carie;
	They shul be shryned in an hogges toord."
670	This Pardoner answerde nat a word;
	So wrooth he was, no word ne wolde he seye.
	"Now," quod oure Hoost, "I wol no lenger pleye
	With thee, ne with noon oother angry man."
	But right anon the worthy Knyght bigan,
675	Whan that he saugh that al the peple lough,
	"Namoore of this, for it is right ynough.
	Sir Pardoner, be glad and myrie of cheere;
	And ye, sir Hoost, that been to me so deere,
	I prey yow, that ye kisse the pardoner;
680	And Pardoner, I prey thee, drawe thee neer,
	And, as we diden lat us laughe and pley."
	Anon they kiste, and ryden forth hir weye.